ДЬОКУУСКАЙ БАСТАКЫ БОЧУОТТААХ ОЛОХТООҔО

"Дьокуускай куорат бочуоттаах олохтооҕо" ааты Дьокуускай куорат Дуумата Константин Николаевич Светлицкэй күбүрүнээтэргэ 1889 сыл атырдьах ыйын 8 күнүгэр аан бастаан иҥэриллибит.

Кини Саха уобалаһыгар үлэлиир кэмигэр (1885-1889 с.) куораттааҕы публичнай бибилэтиэкэни арыйбыт итиэннэ Арассыыйа импиэрийэтин уонна Сибиир ыстатыыстыкатыгар уонна географияҕа сыаналаах кинигэлэри сиэртибэлээбит. Маны таһынан уобаластааҕы түмэли, сири оҥорорго бастыҥ холобур буолар пиэрмэни төрүттээбит. Светлицкэй уурааҕынан бириискэттэн киирэр үп 8000 солк. сыл ахсын куорат дьаһалтатыгар итиэннэ Дьокуускай - Аян быраҕыллыбыт суолу чөлүгэр түһэриигэ уонна өрөмүөҥҥэ ыытыллар буолбут.

БАСТАКЫ ГЕНЕРАЛ

     Сахалартан бастакы генералынан А.И.Притузов буолбута.

     Андрей Иванович 1894 сыллаахха Покровскайга удьуор дьаамсыктар дьиэ кэргэттэригэр төрөөбүтэ. Икки сыллаах педагогическай кууруһу бүтэрбит. 1914 сыл тохсунньутугар аармыйа кэккэтигэр ыҥырыллыбыт. Аан дойду бастакы сэриитин прапорщик чыыннаах түмүктээбит уонна Кыһыл аармыйа кэккэтигэр киирбит. Гражданскай уонна Аҕа дойду Улуу сэриитигэр кыргыспыт. Аҕыс бойобуой уордьан кавалера буолбут уонна элбэх мэтээлинэн наҕараадаламмыт. 1977 сыллаахха Москубаҕа генерал-майор сыбаанньалаах сылдьан өлбүт. Кини кырамтатын күлэ Покровскайга хараллыбыт. Покровскай биир уулуссата А.И.Притузов аатын сүгэр.